धनुषामे थप दहेज नइ देलाक कारण आरती साहकेँ हत्या

धनुषामे थप दहेज नइ देलाक कारण आरती साह नामक महिलाकेँ हत्या कएल गेल खुलासा भेल अछि।

मिथिला बिहारी नगरपालिका ३, धनुषाक मिथिलेश्वर मौवाही घर भेल आ जनकपुरधाम ९ थापा चौकमे रहैत आबि रहल आरतीक पिता विनोद प्रसाद साहक आरोप छनि जेँ हुनकर पति मोतीबाबू साह, ससुर मदनमोहन साह, सासु रेणु देवी साह आ देवर रवि साह मिलकऽ २२ वर्षीय बेटी आरतीक हत्या कएने छथि।

आरतीक विवाह विनोदसँ दू साल पहिने भेल छल । पति, ससुर आ सासु पहिने सेहो बेटीसँ बेर-बेर दहेज मांगैत रहल कहैत विनोद कहलाह जे ओ सब आरतीकेँ मारि-पीटि क’ आओर दहेज लेबाक लेल शारीरिक आ मानसिक यातना दैत आबि रहल छल।

ओ कहलनि जे, जखन हम अपन बेटीकेँ मारैत-पीटैत देखलौँ त कतेको बेर रूपैया दैत रहलौँ, रवि दिन ओकर पति, ससुर, सासु आ देवर ओकरा मारि-पीट करैत गर्दनि काटि देलकै। मृतकके पिता विनोद स्थानीय निवासीके साक्षी मानैत कहलनि जे, “आरतीके मारऽ लेल गर्दन दबेलाक कारण आरती जोरसँ चिचियाएल, चिचियाहट सुनि पास-पडो़सक लोक सभ जमा भेल त, आरती अपनेसँ फँसरी लटकिकऽ आत्महत्या कएलक से बाती भ्रम पसारऽ लागल।” ओ दावा कएलनि जे, “सासुर पक्ष पहिनो आरतीपर थप दहेजक लेल दबाव आ मारि-पीट करैत आबि रहल छल, तेँ बेसी काल हमर बेटी नैहरेमे रहैत छल। ओ सब 12 दिन पहिने फेरसँ नैहरसँ हमर बेटीके बोलाऽ कऽ लगेल, आ रवि दिन साँझमे फेरसँ मारि-पीटकऽ करैत गर्दन रेतिकऽ हत्या कऽ देलकै”।

आरतीक सासु, ससुर, आ पती हत्याक पोल खुलत डरसँ मृत शरीरके जल्दी-जल्दी काव्या अस्पतालमे उपचारक बहन्ने लगेल हूनकर दावी छनि। आरती फँसरी लटैक कऽ आत्महत्या कैने कैह कऽ हमरा साँझमे फोन कऽ जानकारी करौने छल।

मोतीबाबुके काठमांडूमे दोसरे लड़कीसँ प्रेम-सम्बन्ध छै, एहि बारेमे आरतीके जानकारी छल, तेँ बेर-बेर एहि बातके लेल ओकरा सबके मनमुटाव आ झगड़ा होईत आईब रहल छल, मोतीबाबूक चालि-व्यवहारक बारेमे वियाहक बाद हमरा सबके जानकारी भेटल रहेऽ, विवाहके समय लड़का इन्जिनियर छथि, से हमरा सभके कहल गेल, मूदा ओ त ओ ब्रोकर छथि से विवाहक बहूत बादमे ज्ञात भेल, विनोद कहलनि।

विनोदक अनुसार अपन बेटीक हत्या भेलाक बादो जाहेरी दर्ता करऽ नै मानैत छलाह, से दु:ख व्यक्त कएलथि।

एमहर, आरतीक श्रीमान मोतीबाबु साह कहलनि जे “आरतीक स्वास्थ खराब रहलाक कारण रवि दिन बारह बजे धैर बेड पर सुतले छलीह, खाना खाय लेल आग्रह कयलौँ, मूदा ओ नहि मानलनि। उल्टे हमरे गारि-बात देबऽ लागल, हम आवेशमे आवि एक थप्पड़ मारि देलौँ आ घर सँ निकलि गेलौँ। साँझमे घर घूरलाक बाद आरतीके खोजलौँ त ओ भितरसँ कोठा बन्द कैने छलीह, हम बेर-बेर बाहरसँ हूनका बजेलौँ मूदा कोनो प्रतिक्रिया नहि देलाक बाद अन्तमे केबाड़ तोड़लौँ त, देखैत छी जे आरती पंखामे फँसरी लटैक कऽ आत्महत्या कऽ लेने छथि। हम त आबाक भऽ गेली।”

घटनाक अनुसन्धान जिला प्रहरी कार्यालय धनुषाक प्रहरी नायब उपरीक्षक वेदप्रसाद गौतम कऽ रहल छथि, से जनतब अछि । वो कहलनि, “पोष्टमार्टमक रिपोर्ट अएलाक बाद मात्रे कहल जा सकैय जे ई आत्महत्या अछि की हत्या।” एकरा लेल प्रहरी सुक्ष्म अनुसन्धान कऽ रहल छथि, ओ कहलनि। एहि बिच मृतकक श्रीमान मोतीबाबु आ ससुर मदन मोहन साहकेँ नियन्त्रणमे लेने कहल गेल अछि।

आरती साहपर भेल अन्याय, अत्याचारसंँ भेल हूनक मृत्युक कारण आत्महत्या अछि वा हत्या, ई त सम्बन्धित निकाय द्वारा न्यायिक जांचके बादे पता चलत, एहि बीच बीतल मंगल दिन साँझमे मृतक आरतीके उचीत न्याय मिलै, ताहि लेल जनकपुरधामक जनक चौक; जनक मंदिरसँ जानकी मन्दिर धैर हूनक परिवारक सदस्य सभ, नातेदार, साथी-भाइ, समाज-मिथिलि-मधेशक मुखर आवाज: लक्ष्मी (मधेशके बेटी) लगायत समाजक किछु अधिकारकर्मी आ अगूवासभ “क्याण्डल मार्च” कएने छलथि।