१५ वैशाख २०८०, शुक्रदिन
आइ लभ मिथिला
सप्तरी, सप्तरीक बोदे बइसाईन नगरपालिका स्थानीयस्तरके विषयवस्तुसबकेँ समटिकऽ मैथिली भाषामे पाठ्यपुस्तक निर्माण कएलक अछि । मुदा, शिक्षक निर्देशिका नेपाली भाषामे तैयार कएल गेल अछि ।
नगरपालिका भितरके विभिन्न विषयवस्तु सबकेँ विद्यालयमे अध्यापन करएबाक लेल स्थानीय तह पाठ्यक्रम तैयार ककऽ ओहि अनुसार पाठ्यपुस्तक विद्यालयमे पठनपाठन कराअओल जाएत आ तैयार कएल गेल आधारभूत तहके स्थानीय पाठ्यक्रम स्वीकृतिक क्रममे रहल नगर शिक्षा शाखा अधिकृत जनतब देलनि अछि। एकीकृत पाठ्यक्रमपर आधारित कक्षा १ सँ ८ धरिक पाठ्यक्रम निर्माण कएल गेल अछि । कक्षा १ सँ ३ धरि एकीकृत ढाँचामे निर्माण कएल गेल पाठ्यपुस्तक शैक्षिक सत्र २०८० मे परीक्षण रुपमे कक्षा १ मे मात्र लागू होएत नगर शिक्षा अधिकृत रामसागर यादव जनतब देलनि।
तैयार कएल गेल पाठ्यक्रममे मैथिली भाषाक अपने तिरुहुता (मिथिलाक्षर) लिपिक विषयवस्तु समेटल गेल छै । पाठ्यक्रममे स्थानीय तहमे रहल सांस्कृतिक पक्ष आ प्रर्याप्त मात्रामे मैथिली शब्दार्थ प्रयोग कएल गेल अछि । स्थानीय आवश्यकता अनुसारक विषयवस्तु भेलासँ विद्यार्थीसबहक लेल रोचक विषय होएत से विश्वास स्थानीय अधिकारी कएने छथि।
नेपालक संविधानकेँ मौलिक हक अनुसार मातृभाषामे शिक्षा प्राप्त करब तेकर व्यवस्था कएल गेल अछि । ओहि अनुरुप नगर भितरमे रहल ३० टा सामुदायिक विद्यालयमे राष्ट्रिय पाठ्यक्रम प्रारुप, २०७६ अनुसार आधारभूत तहकेँ विद्यालयमे मातृभाषामे स्थानीय विषयक पाठ्यक्रम लागू कएल जाएत नगरपालिकाकेँ शिक्षा शाखा अधिकृत जनतब देलनि।
